الشهر السادس

طبعا لو استنيت لحد ما ادون كل الايام اللي فاتت مش هاكتب حاجة خالص

قررت اني اكتب الجديد و لو لقيت وقت ابقي ادون اللي فات

***********

النونو كمل يوم الخميس ستة شهور بالظبط

طبعا المفروض انه يبدأ ياكل بالمعلقة

بدأت أأكله من يوم الثلاثاء يعني يوم 18 مارس

بدأت بمعلقة صغيرة من

single grain cereal (rice)

بقيت ازودها

كل يوم شوية

اول امبارح بدأتله صفار البيض و هازوده شوية بشوية خلال الاسبوع ده

***********

ماما معتقدة ان عندي هسهس

و كمان عمة النونو

يعني لما رفضت و باصرار ان النونو ياكل غير لما يكمل ست شهورمش في الرابع زي معظم الناس ما كانت بتعمل

خلال الشهرين دول كنت بسمع تريقة منها اننا كلنا اتربينا كده

و الناس كلها بتربي عيالها كده

و عيالها زي الفل

طبعا كانت دايما تقوم خناقة

لاني مجوعة الولد

بصراحة انا استسلمت في بعض المرات

ساعات يعني كنت بدي النونو نقط يوسفي او برتقال بناء علي التوجيهات

و كان بيبقي مستمتع

فده كان بيزود الضغط عليا

بس بقاوم باقي المغريات

و استسلمت اخيرا لما كمل خمس شهور و تلات اسابيع

و أأكلته موز و عصير برتقال يومين ورا بعض

معلقة واحدة

بس النونو طلعتله حساسية في دقنه

طلعله حبوب حمره

اكتشفت بعدها ان فواكه الموالح

citrus fruits

مش المفروض اديها للنونو قبل سنة

ندمت جدا

***********

النهاردة و النونو قاعد معانا علي الفطار

ماما قالتلي متديله حته جبنه

و طبعا اتخانقنا